Nagpaguwa ang Vatican sang laragway ni Pope Francis sa labing-una nga tion halin sang na-ospital ini masobra isa ka bulan na ang nagligad.
Sa picture, nagatalikod ang 88-anyos nga Santo Papa samtang nagapungko ini sa chapel sang Gemelli Hospital sa Roma.
Wala sang nakit-an nga nakatakod kay Pope agud nga makabulig sa iya pagginhawa, apisar nga base sa nauna nga reports sang Vatican, ginagamitan si Pope sang oxygen sa iya treatment bangud sa na-eksperyensyahan anay nga breathing crisis.
Suno sa Holy See Press Office, nag-upod ang Santo Papa sa misa kaupod sa iban nga mga pari sa amo nga chapel sang Domingo oras didto sa Roma.
Sa guwa sang ospital naman, madamo sang kabataan ang nagkadto kag nagtipon para ipangamuyo ang Pope nga padayon nga naga-recover sa double pneumonia.
Kalabanan ang may dala nga yellow balloons, drawings, mga placard nga may mensahe para sa Pope, kag may mga bulak.
Kahapon, kadungan sang Second Sunday of Lent, may yara sang mensahe si Pope nga gin-publish sang Vatican nga nagsiling nga maluya siya kag nagapangatubang sang tion sang pagpanghangkat.
Bisan maluya ang iya lawas suno kay Pope kaangay sa iban nga nagamasakit, wala sang makapugong sa pagpalangga kag pagpangamuyo para sa isa kag isa.
Kahapon amo ang ika-lima nga sunod-sunod nga Domingo nga wala personal nga nakapanguna si Pope sa Angelus Prayer nga nakaandan niya himuon sa St. Peter’s Square sa Vatican kun matapos na ang misa.
