ILOILO CITY – Nagnubo ang numero sang gin-report nga pagpang-abuso sa mga kababayihan kag mga kabataan sa syudad sang Iloilo subong nga tuig.
Santo sa data sang Iloilo City Police Office (ICPO), halin sang Enero tubtob Nobyembre 2020, 402 ang reported cases sang Violence Against Women and Children (VAWC).
Ini ang mas manubo sa narekord sa kaangay man nga time period sang 2019 kun sa diin 454 ang mga kaso.
Sa interview sang Bombo Radyo kay Police Executive Master Sergeant Ruth Laudato, chief clerk sa Women and Children Protection Desk sa Iloilo City Police Office (ICPO), iya ginpahayag nga duha ang posible nga factors kun ngaa nagnubo ang data.
Posible suno sa natungdan nga bangud sang mga quarantine restrictions subong nga tuig, nangin limitado ang hulag sang mga babayi kag mga bata kag wala sila naka-report sa mga pulis.
Ikaduha nga factor suno kay Laudato amo ang positibo nga bahin kun sa diin posible suno sa iya nga nag-isa ukon naghangpanay ang magpamilya subong nga may pandemya bangud masami sila nga naga-updanay sa sulod sang ila nga balay.
Bilang kabahin sang kampanya agud malikawan ang pagpang-abuso, required ang mga barangay nga magtukod sang Barangay Women and Children’s Protection Desk (WPCD) agud may mapalapitan ang mga biktima.
Suno kay Anna Karla Villanueva, secretariat sang Regional Inter-Agency Committee against Trafficking, Child Pornography and Violence Against Women and Children (RACT-CP-VAWC) sa Western Visayas, sa idalom sang sini nga talatapan sa barangay, mabuligan ang mga biktima nga mag-file sang reklamo batok sa abuser.
24/7 suno kay Laudato ang serbisyo sang trained nga mga personnel sang Barangay Women and Children’s Protection Desk.
Diri ginalauman nga mabuligan ang mga babayi nga nagaeksperyensya sang physical, psychological, economical ukon sexual abuse.
Nagpasalig man ang natungdan nga nahibaluan sang mga personnel sa sini nga desk nga highly-confidential ang ila ginauyatan nga mga kaso.
Nahibaluan nga labi pa nga ginpabaskog ang kampanya batok sa pagpang-abuso ilabi na bangud gina-obserba sa Piliipinas ang 18-day Campaign to End Violence Against Women (VAW) subong nga Nobyembre 25 tubtob Disymbre 12.
