ILOILO CITY -Nagaproblema ang mga vendor matapos nga ginpangkakas kag ginpangguba ang ila tagsa ka mga pwesto sa sagwa sang Iloilo Terminal Market nga nagalaksam na sa dalan.
Sa interview sang Bombo Radyo kay Thelma Poticar, manugabligya sa nasambit nga merkado, iya ginpahayag nga masobra na sa 30 ka tuig siya nga nagabaligya sa sagwa sang Iloilo Terminal Market.
Suno kay Poticar, ginpahanugutan lang sila nga makabaligya sa sagwa sang merkado humalin 6:00 sang kasisidmon tubtub 6:00 sang aga.
Ginpahayag ni Poticar nga kun gab-i, wala man sang may mabakal sang ila nga baligya.
Kalabanan sa ila suno sa natungdan ang naghalin pa sang mga malayo nga lugar kag nagagasto sang pamasahe agud nga makabaligya sa nasambit nga merkado.
Bangud nga wala na sila sang pwesto, ginpahayag ni Poticar nga kinahanglan pa nila nga magbayad sa kargador agud nga maghakwat sang ila baligya.
Suno naman kay Lebedina Cerbas sang Tapaz, Capiz, magadugang ang kapigaduhon sang mga vendor bangud sa ginahimo sang gobyerno.
Ginpahayag ni Cerbas nga wala man niya ginapunggan ang Oplan Hawan ukon ang clearing operations sa mga national raod apang kun tani, may yara sang igahatag nga pwesto ang gobyerno para sa mga vendor.
Kun madulaan sila sang pwesto, ginpahayag ni Cerbas nga mapilitan na lang sila nga maghimo sang krimen agud nga may yara sang palangabuhi-an.
May kaangtanan diri, ginpahayag naman ni Mr. Erick San Agustin, market-in-charge sang nasambit nga merkado, nga wala pa sa subong sang lugar agud nga pahamtangan sang pwesto sang mga vendor nga apektado sang Oplan Hawan.
Suno kay San Agustin, indi pa siya makapasalig nga mahatagan sang pwesto ang mga vendor bangud nga padayon pa ang clearing operation.
Ang maathag lang suno kay San Agustin amo nga indi na mahimo nga makabaligya sa higad sang dalan ang mga vendor.
