ILOILO CITY – Nagahingyo sang duha ka semana ang Local Economic and Enterprise Office agud nga mapangitaan sang lugar ang mga vendor nga naapektuhan sang Oplan Hawan sa palibot sang Iloilo Terminal Market.
Ini ang kasunod sang natabo nga pagsumpakilay sang Oplan Hawan team kag sang market vendors kadungan sang ginpatigayon nga clearing operation.
Kadungan sang pagsinapol nga gintambungan sang mga market vendor, ginpasalig ni Ariel Castañeda, pinuno sang Local Economic and Enterprise Office, nga iya pangitaan sang paagi agud nga mahitso ang problema.
Suno kay Castañeda, sa tion nga may yara na siya sang may makita nga space sa sulod sang Iloilo Terminal Market, iya ini nga palimpyuhan antes ang pagpasa sang request kay Iloilo City Mayor Jerry Treñas para sa approval.
Ginpahayag ni Castañeda nga dapat nga sundon ang ginapatuman nga Oplan Hawan apang indi man niya mapabay-an nga madulaan sang palangabuhi-an ang mga manugbaligya.
Sa subong, nagahingyo sang bulig ang natungdan gikan sa mga manugbaligya agud nga wala sang may matabo nga kinagamo.
Samtang, sa interview sang Bombo Radyo kay Castañeda, iya ginpahayag nga may yara na siya sang disenyo sang balaligyaan sa tion nga pahanugutan ni Mayor Treñas nga hatagan sang space sa sulod sang merkado ang mga apektado nga manugbaligya.
Suno kay Castañeda, magalapad sang 1,000 tubtub 2,000 square meters ang space nga itigana sa mga manugbaligya.
Agud nga mangin matalunsay ang pagginawi sa sulod sang merkado, kinahanglan nga alalangay ang kadakuon sang mga balaligyaan, pagahamtangan sang suga kag kinahanglan nga organisado ang mga baligya.
