Nagdinaguso ang mga Pinoy sa Bayanihan Kennedy Town Centre sa una nga adlaw sang overseas absentee voting sa Hong Kong.
Duha ka oras pa lang nga nakaumpisa ang pagboto sang mga registered Filipino voters apang naghingyo na ang Philippine Consulate nga magbalik lang ang iban pagkasunod nga mga adlaw agud nga malikawan ang pagdis-uganay.
Suno kay Bombo International Correspondent Jing Gabiazon direkta sa Hong Kong, mismo si Consul General Raly Tejada ang nag-apelar sa mga Pinoy nga magbalik lang matapos nga ginmuno sang Hong Kong Police Force ang kalabaon sang pila nga posible maangot sa paglapta sang Covid-19.
Tubtub pa sa Mayo 9 ang overseas absentee voting, kadungan sang local kag presidential elections diri sa Pilipinas.
Sa latest data nga gin-release, ginpahayag nga 3,285 ka registered voters ang nakatigayon nga makaboto kahapon nga adlaw sang Domingo.
Nag-apelar man ang Philippine Consulate in Hong Kong sa employers nga pahanugutan ang ila Filipino employees nga magboto sa weekdays.
Mas istrikto subong ang pagpatuman sang protocols sa Hong Kong bangud ini na ang ika-lima nga Covid-19 surge sa amo nga lugar.
