Matigdas nga ginpahayag ni President Ferdinand Marcos, Jr. sa atubang sang international community nga halos isa na ka “act of war” kun may isa ka Pilipino nga mapatay bangud sa pagpang-atake sang China Coast Guard (CCG) sa West Philippine Sea.
Sabat ini ni Marcos kadungan sang 21st International Institute for Strategic Studies-Shangri-La Dialogue defense summit sa Singapore sang ginpamangkot na kun makabig na bala nga lapaw sa boundary kun may isa ka Pinoy sailor nga mapatay bangud sang water cannon attacks sang China Coast Guard sa kadagatan nga iya man sang Pilipinas.
Pahayag pa ni Marcos, pat-od nga magasaka man ang lebel sang response kun mabuhinan ang Filipino serviceman — Coast Guard, militar man ukon Navy — bangud sa aktwasyon sang China.
”If there’s an incident that ended up killing a Filipino serviceman, be they a Coast Guard or in the military, part of the Navy, that would certainly increase the level of response,” suno sa president. ”If by a willful act, a Filipino, not only serviceman or any a Filipino citizen, if a Filipino citizen is killed by a willful act, that is I think a very very close to what we define us act of war.”
”Once we have already — we already have suffered injury, but thank God, we have not yet gotten to the point where any of our participants, civilian or otherwise have been killed,” dugang sini.
”But once we get to that point, that is certainly we would have crossed the Rubicon and certainly crossed the Rubicon. Is that a red line? Almost certainly it’s going to be a red line.”
Mahimo suno sa iya nga mangayo man sang bulig ang Pilipinas halin sa iban nga kaalyado nga pungsod kun matabo na ini nga “act of war.” Isa sa ginalantaw amo ang kasugtanan sang Pilipinas kag Estados Unidos sang Amerika ukon ang Mutual Defense Treaty.
Nahibaluan nga nagapanindugan man si Marcos nga indi lang maggamit sang water cannons ang Pilipinas para nga indi na magsaka pa ang tension sa West Philippine Sea nga tensyonado na nga daan bangud sa harassment sang China Coast Guard kun sa diin ang latest ang natabo lang sang nagligad nga semana kun sa diin nagapang-bomba ang mga ini sang tubig sa mga sakayan sang Pilipinas.
