MANILA – Malipayon nga gin-anunsyo sang veteran actress nga si Carmi Martin nga isa siya ka coronavirus survivor.
Sa Facebook post, ginpakigbahin ni Carmi nga nagpa-idalom siya sa COVID-19 test sang Setyembre 13 bilang requirement sa iya upcoming project.
Sa wala ginlauman, nagpositibo sa COVID-19 test ang 57 anyos nga aktres kag nagpaidalom sa two-week quarantine nga ginakabig naman niya nga “honeymoon with God.”
Ang pagka-relihiyoso suno kay Carmi ang nakabulig sa iya agud maka-angkon sang positive attitude sa pihak sang pagtilaw sa iya kabuhi.
Magluwas sa pagpangamuyo, ginpahayag sang natungdan nga nakabulig man ang pag-exercise kag pagkaon sang healthy food.
Kadungan sini, ginpasalamatan man niya ang tanan nga nagbulig sa iya agud nga maka-recover.
