Handa na si Vice Mayor-elect Love-Love Baronda nga ipaiway ang pulitika kag magtutok sa trabaho sa tion nga makapungko na sa pwesto kaupod ang mga bag-o nga gin-ileher nga mga lideres sang syudad sang Iloilo.
Sa interview sang Bombo Radyo kay Baronda, iya ginpahayag nga tama gid kadako ang iya pagpasalamat sa tanan nga mga Ilonggo nga naghatag sang suporta kag pagsalig sa iya pagpadalagan bilang bise-alcalde.
Suno sa iya, wala gid nagbiya ang mga pumuluyo sang syudad sa iya halin pa sang una, kag sa sining piniliay, liwat nga ginpakita ang ila pagsalig kag paglaom sa iya liderato.
Dugang pa niya, excited na siya nga magserbisyo kaupod ang iban pa nga mga lideres nga nagdalaog sa tagsa-tagsa ka posisyon.
Ginkilala man niya ang kabudlay sang mga nagpanindugan nga magsuporta sa iya kag sa Team Sulong Gugma.
Nagpalab-ot man sang mensahe si Baronda sa iya kasumpong nga si outgoing Vice Mayor Jeffrey Ganzon nga kuntani magnami na ang ila relasyon kag ang iya respeto yara sa gihapon sa pihak sang wala pag-ilintindihanay sa panahon sang kampanya.
