Wala napunggan ni Iloilo City Vice Mayor Jeffrey Ganzon nga sawayon si Councilor Urminico “Nick” Baronda kaangot sa pagpasar sang 10-year solid waste management plan sang General Services Office (GSO).
Nalakip ang amo nga plano sa session subong nga adlaw sang Iloilo City Council.
Sa interview sang Bombo Radyo kay Vice Mayor Ganzon, iya ginpahayag nga ang iya ginhimo ang isa lamang ka pahanumdom bangud masami nga nagasal-ot si Baronda apisar nga wala pa ini na-recognize.
Para kay Ganzon, daw kaangay nga gina-insulto sang opisyal ang normal nga dalagan sang session.
Suno kay Ganzon, dapat lang nga respetohon ang pagsulundan ilabi na nga amo ini ang yara sa parliamentary rules.
Ginhambalan man sang natungdan nga daw nagapaalam-alam lang si Baronda.
Nahibaluan nga ginaduso ni Councilor Baronda nga padalman anay ang nakasaad sa tikang antes nga ipasar, apang bangud kay ‘urgent’ kinahanglan ini gilayon maaprubahan agud malagas ang rekisitos sa pagproseso sang bag-o nga sanitary landfill.
Gin-athag naman ni Ganzon nga indi sini tuyo ma-offend si Baronda kag kinahanglan lamang niya nga ipahanumdom ang insakto nga pag-observe sang session.
