Nagapati si Municipal Administrator Juan Miguel “Migs” Flores sang Oton, Iloilo nga may kahisa kag insecurity ang iya makasumpong sa pagka-alkalde sa 2022 elections.
Nahibaluan nga nag-file sang Certificate of Candidacy (COC) si Flores agud magpadalagan bilang alkalde sa diin bungguon sini ang iya mismo paryente kag tiyo nga si Vice Mayor Vicente Flores nga nagpadalagan man sa pagka-alkalde.
Sa interview sang Bombo Radyo kay Migs Flores anay konsehal sang Oton, Iloilo, iya ginpahayag nga kabahin siya sang partido nga Aksyon Demokratiko kag ginbansagan siya sadto bilang ‘Isko Moreno sang Oton, Iloilo.’
Apang suno sa iya, nagmando sang amo nga tion si Vice Mayor Vicente Flores nga ipa-delete amo nga bansag.
Suno kay Migs, bilang administrador sang Oton, nagalibot siya sa banwa agud himuon ang iya mga katungdanan.
Apang sa tion nga makabaton siya sang mga pagdayaw halin sa publiko, ginapahayag nga ginahasaan siya sang mga yara sa mataas nga posisyon kag kaangay nga ‘threat’ siya sa mga ini.
Pahayag niya, madamo pa kuntani siya sang luyag nga himoon kag handom para sa Oton, Iloilo, apang indi niya ini matuman kun mangin administrador lang siya ukon konsehal.
Gin-ako man niya nga madugay na siya nga ginpangakuan nanday Oton, Iloilo Mayor Carina Flores nga buligan agud makapadalagan sa pagka-bise alkalde, apang wala ini sang katumanan.
Bangud man suno sa natungdan sa mga paghinisaay, ”CIVIL” na lang ang ila relasyon sang iya tiyo nga si Vice Mayor Vicente Flores.
”BANGUD SA IYA HANDOM, MANGITA NA SIYA YA PAAGI NGA TAPAKAN ANG ISA PARA SIYA ANG MAGSAKA”
Nagapati naman si Vice Mayor Vicente Flores nga bangud sa masanyog nga handom ni Municipal Administrator Migs Flores, handa ini nga tapakan ang iban nga tawo.
Sa interview sang Bombo Radyo kay Vice Mayor Flores, iya ginpahayag nga indi matuod nga may kahisa siya sa iya ‘hinablos sa pakaisa’ bangud yara siya sa legislative department kag wala siya nagapahilabot sa mga ginapatuman nga proyekto ni Migs.
Indi man matuod suno sa iya nga nagpangako sila kay Migs nga batakon ini para sa pagka-bise-alkalde.
Suno sa iya, wala man sang kamatuoran nga ginpa-edit ukon ginpa-delete niya ang news article may kaangtanan kay Migs.
Dugang sang natungdan, kaangay nga nagahigko ang huna-huna sang iya hinbalos bangud sa iya matayog nga mga handom.
