Nagpasaka na sang position paper ang Vice Mayors League of the Philippines sa Department of the Interior and Local Government (DILG) Central Office may kaangtanan sa DILG Opinion No. 95, Series of 2025, nga gin-adoptar sang majority sang Iloilo City Council.
Sa interview sang Bombo Radyo kay Iloilo City Vice Mayor Julie Grace Barond, iya ginpahayag nga ila na lang ginahulat ang sabat halin sa nasambit nga opisina.
Suno kay Baronda, ginpaathag sang mga representante sang DILG sa committee meeting nga advisory lamang ang nasambit nga opinion kag indi ini pareho sa memorandum circular nga may mandatory nga pagsulundan.
Ginpahayag man niya nga na-isyu na ang DILG opinion antes pa nangin undersecretary si DILG Undersecretary for Public Safety Jed Patrick Mabilog, apang, wala siya sang impormasyon kon nakakomento na si Mabilog angut sa nasambit nga isyu sang Iloilo City Council.
Nagapati si Baronda nga delikado nga precedent ang pag-limit sang legislative functions sang vice mayor bangud lamang indi aligned sa mayor ukon indi magkapartido ang mga ini.
Bangud, suno sa bise alkalde, kun mahimo ini sa vice mayor nga ikaduha sa pinakamataas nga opisyal sa lokal nga panguluhan, posible man nga maapektuhan ang ordinaryo nga mga pumuluyo.
Ginkwestyon man ni Baronda ang pag-limit sang iya legislative function bangud nga ang Iloilo Provincial Government ang allowed kun sa diin, ginahatagan sang oportunidad ang vice governor nga magduso sang iya mga proposed legislation.
Ginpunto niya nga dapat magbinuligay ang mga miyembro sang konseho bangud wala sang monopoly of ideas, kag ang mga ginaduso nga ordinansa ang mahimo makahatag sang solusyon sa mga problema sang pumuluyo.
Dugang pa ni Baronda, indi kinahanglan nga limitahan ang iya legislative functions, bangud ang iya mga ordinansa ang mahimo kuntani makabulig sa pagpauswag sang siyudad kag sa pagserbisyo sa mga Ilonggo.
