ILOILO CITY – Maga-istar sa gihapon sa Davao City si Vice President-elect Sara Duterte-Carpio apisar nga magapungko na ini bilang bise presidente sa katapusan sang bulan.
Suno sa iya, indi siya magpa-alam sa mga Davaoeños bangud sa Davao siya sa gihapon naga-istar kag magatrabaho gid lamang sa Manila.
Ang arrangement ang pareho man sa iya nga amay nga si Presidente Rodrigo Duterte nga sa sulod sang anum ka tuig, nagatinir sa Malacañang sa adlaw nga may opisina samtang ang iya pamilya ang yara sa gihapon sa Davao City.
Sa baylo nga magpa-alam, ginpahayag ni Duterte-Carpio nga magatutok siya sa pagpasalamat sa iya mga constituents kag city officials sa iya inauguration kag flag ceremony speeches sa mga masunod nga mga inadlaw.
Pahayag ni Duterte, nagapasalamat siya sa mga empleyado bangud nga indi masarangan sang isa lamang ka alkalde ang tanan nga nalab-ot sang syudad kun wala sila.
Samtang, ginpahayag niya nga ang indi niya malipatan nga natabo sang siya ang nagpungko amo ang 2011 flash flood, ang pagpamomba sa Roxas night market sang 2016 kag ang sunog sa NCCC Mall sang 2017.
