ILOILO CITY – Ginpanindugan ni Vice President kag Department of Education (DepEd) Secretary Sara Duterte-Carpio nga final na ang pagbukas sang klase sa Agosto 22 sa pihak sang panawagan sang pila ka mga manunudlo nga suspendiron anay ini.
Suno sa bise presidente, aprubado na ini ni Presidente Ferdinand Marcos Jr. kag napagwa na ang Department Order 34.
Nagpasalig man si Duterte-Carpio nga hatagan niya sang pagtamod ang panawagan nga indi anay pag-ipatuman ang full face-to-face classes ilabi na ang panawagan sang Teachers Dignity Coalition agud nga mahatagan sang tion ang mga manunudlo kag mga estudyante nga makahanda.
Dugang pa niya, mahimo man sa gihapon nga mapatuman ang kumbinasyon sang face-to-face classes kag distance learning humalin sa Agosto tubtob Oktubre 31.
Ang full face-to-face classes ang magasugod sa Nobyembre 2.
Pahayag pa sang bise presidente, safe na nga magbukas sang mga eskwelahan bangud ang publiko ang na-anad na sa pagsunod sang health protocols kag ang COVID-19 vaccine kag bulong ang availble na.
Indi mandatory ang vaccination sa pagbukas sang face-to-face classes.
Suno kay Vice President kag Department of Education (DepEd) Secretary Sara Duterte-Carpio, wala dapat sang discrimination para sa mga indi bakunado nga mga estudyante bangud nga indi man mandatory ang vaccination sa pungsod.
Dugang pa niya, wala sang problema kun ang mga kabataan ang naga-updanay sa mga eskwelahan ilabi pa nga kun yara na sila sa gwa sang eskwelahan, indi man malikawan nga mag-inupdanay ang mga ini.
Magluwas nga indi mandatory ang pagbakuna, wala man sang requirement kun pila ka mga estudyante ang dugang nga magatuon sa isa ka hulot kag ang physical distancing ang ipatuman kung kinahanglan.
Ang kakulang sang hulot ang madugay na nga problema sang pungsod.
Bangud sini, nagpasalig ang bise presidente nga magatukod ang gobyerno sang dugang nga mga hulot.
