Makatuga sang tuman kadaku nga halit sa isa ka biktima sang krimen ang pagpamasol nga iya mabaton gikan sa mga tawo sa iya palibot.
Sa interview sang Bombo Radyo kay Francis Ray Subong, registered guidance counselor kag Public Relations Officer sang Philippine Guidance and Counselling Association, iya ginpahayag nga masami nga nagakatabo ang pagpamasol sa biktima ukon ang ginatawag nga victim blaming paagi sa porma sang negatibo nga mga social responses.
Bangud sa wala na-filter nga mga impormasyon sa social media kag bangud sa kakulang sang media ethics sa iban nga mainstream kag social media, mahimo man magsugpon sang komento ang iban nga mga tawo suno kay Subong apisar wala man nakahibalo sang puno kag punta sang matuod nga isyu.
Ini suno kay Subong ang nagahatag sang dugang nga palas-anon sa biktima.
Kun nagapadayon ang victim blaming suno kay Subong, posible nga magtulod ini sa biktima nga maghipos na lang ukon indi na lang mag-report sa otoridad sa krimen nga ginhimo batok sa iya.
May epekto man ini sa mental health sang biktima kag mahimo pa magtuga sang depression.
Ginaduso man sang mga mental health groups suno kay Subong ang pagbutang sang comprehensive mental health programs sa law enforcement agencies kag sa iban pa nga government agencies.
Ginpahayag ni Subong nga mas maayo nga trained ang law enforcers kun ano ang ihambal kag himuon sa mga biktima sang krimen nga nagadangop sa ila talatapan.
Dapat man idevelop ang rehabilitation programs indi lang para sa mga biktima kundi pati na sa mga suspek bangud sila ang may tsansa man nga magbag-o.
