Mas ginpahugtan pa sang Vietnam ang mga pagsulundan sa pagpakig-away batok sa COVID-19.
Suno kay Bombo International Correspondent Arly Dela Peña, direkta sa Vietnam kag tumandok sang Lanas, Barotac Nuevo, Iloilo, nagmando ang mga otoridad sang Ho Chi Minh City sang 10 ka mga pagsulundan.
Ini ang ginlakipan sang pagsuspende sang byahe sang passenger taxis, ride-hailing taxis kag pampubliko nga bus.
Ginban man ang pagtililipon sang masobra tatlo ka tawo sa gwa sang ulubrahan kag mga ospital sa diin ginapahanugutan lamang nga magwa ang mga tawo sa ila mga balay kun kinahanglan kag kun ‘essential’ ang katuyuan.
Ginpasirado man ang pampubliko nga mga beach, amo man ang dine-in eateries humalin kagapon, Hunyo 20.
Apang ginapahanugutan sa gihapon ang pick-up kag delivery services.
Matandaan nga sang pinakauna nga semana sang Hunyo, ginsuspende ang tanan nga inbound flights sang international airport sang Vietnam halin sa abroad bangud sa COVID-19 outbreak.
As of June 20, 2021, ginkumpirma sang Ministry of Health sang Vietnam nga may yara na sang 12,978 ka COVID-19 cases ang nasambit nga pungsod.
