Tag-isa ka daog na lang ang kinahanglan sang duha ka Pinoy boxers sa 1st World Olympic Qualifying Tournament sa Burto Arsizio, Italy agud nga makasulod sa Paris Olympics 2024!
Isa diri amo si Nesthy Petecio nga nag-abanse na sa semifinals sang women’s 57kg kaina sang kaagahon (oras sa Pilipinas) paagi sa paglutos kay Maud Van Der Toorn sang Netherlands via unanimous decision.
Sa amo nga sambuwa, diutayan lang nga wala makuha ni Petecio ang kadalag-an bangud nagkadto kay Van Der Toorn ang Round 1. Nagbawi ang Pinay paagi sa iya nga counter attacks sa masunod nga duha ka rounds.
Nag-abanse naman ang Pinay boxer nga si Aira Villegas sa quarterfinals sa women’s 50kg category sa amo man nga qualifying tournament matapos ginlutos si Sofie Vinter Rosshaug sang Denmark via unanimous decision.
Pananglitan magdaog diri si Villegas, maga-martsa man ini padulong sa Paris Olympics.
Wala naman ginpalad ang Olympian nga si Rogen Ladon matapos nalutos ini sa Round of 16 sa men’s 51kg class sa kamot ni Kiaran MacDonald sang Great Britain via 4-1 split decision.
Nahibaluan nga 10 ka boksidor ang ginpadala sang Association of Boxing Alliances in the Philippines (ABAP) agud mag-compete sa amo nga qualifiers.
As of press time, ang mga kuwalipikado pa lamang nga makatiglawas sa Pilipinas sa Paris Games amo sanday Eumir Marcial sa boxing; EJ Obiena sa polen vault; kag Carlos Yulo kag Aleah Finnegan sa gymnastics.#
