Indi matupongan ang kalipay sang ginbansagan nga ‘viral mama’ matapos nga nakuha sang iya anak ang bronze medal sa 400-meter low hurdle sa nagapadayon nga Western Visayas Regional Athletic Association (WVRAA) Meet 2025 sa Antique.
Ini amo si Ray-ray Cordova ukon mas kilala sa tawag nga ‘Mama Rayray’.
Samtang ang anak sini amo si Mariah Laudine Cordova sang Tabugon Elementary School, kag residente sang Dingle, Iloilo.
Sa interview sang Bombo Radyo kay Mama Rayray, iya ginpahayag nga ini ang labing-una nga kahigayunan nga nakalab-ot ang iya anak sa regional level.
Suno kay Cordova, tuman ang iya nga pagpasalamat bangud sa wala sang may malain nga natabo kadungan sang kompetisyon sang iya anak.
Ginpahayag man sini nga Grade 5 sang nagsugod sa paghanas sa amo nga sports ang iya anak kon sa diin, naglab-ot lamang ini sang nagligad nga tuig sa integrated meet.
Nagpasalamat man ang natungdan sa mga manunudlo kag coach sang iya anak nga nagsuporta kag nagbulig agud nga mangibabaw sa amo nga kompetisyon.
