Ginkumpirma sang National Police Commission (NAPOLCOM) nga nag-report na liwat sa trabaho si Patrolman Francis Steve Fontillas, ang pulis nga kilala nga si Fonts Stv Vlogs sa Facebook, nga nag-viral bangud sa iya social media posts nga naangot sa pagdakop kay former President Rodrigo Roa Duterte.
Suno kay Napolcom commissioner Rafael Vicente R. Calinisan, nagpasalig man si Fontillas nga indi na ini magpang-post sang “seditious comments” kag “hate speech.”
Pahayag pa ni Calinisan, nagahilibion ang patrolman samtang nagapangayo sang pasensya sa iya nahimo.
“Pat. Fontillas reported to the QCPD yesterday, March 20, 2025. He was crying and extremely apologetic. Fontillas also promised not to post seditious comments and hate speech on his social media pages,” suno sa commissioner.
Ginaproseso na ini subong kag ipaidalom sa restrictive custody. Padayunon naman sang Napolcom kag Philippine National Police (PNP) ang criminal kag administrative cases batok kay Fontillas.
Una na nga ginbuyagyag sang Napolcom nga sang Pebrero, nag-request ang superior ni Fontanillas nga magpaidalom ini sa mental health check sa regional office, apang wala ini nagsipot kag nagpamalibad nga magpa-test sa medical team sang PNP.
Ang gin-file sang Napolcom nga panumbungon batok sa patrolman amo ang grave misconduct kag conduct unbecoming of a police officer kasunod sang ila ginpatigayon nga kaugalingon nga imbestigasyon. Magluwas sa administrative cases halin sa Napolcom, una naman nag-file ang PNP sang “inciting to sedition” criminal case batok sa patrolman sa Quezon City Prosecutor’s Office.
‘PINATAWAD PA RIN PO AKO NG PNP’
Sa latest nga Facebook post, ginpahayag ni Fontillas nga ginpatawad siya sang PNP bisan sa iya nahimo.
“Sa kabila ng paggimbal ko sa organisasyon at sa gobyerno, pinatawad pa rin ako ng PNP. Isa pa rin akong pulis ng Pilipinas,” pahayag sini. “Maraming maraming salamat po sa Panginoon. Maraming, maraming salamat po sa buong pamunuan ng PNP, lalong-lalo na sa QCPD, na nakinig at naunawaan ang mga saloobin at hinaing ko at sobrang gaan na ng loob ko.”
Antes sini nga mga development, ginkwestyon pa anay ni Fontillas ang complaint nga gin-file batok sa iya bangud base sa iya statement, nagpabutyag man lang siya sang iya panindugan.
“Inciting to sedition daw ‘ýung ginawa ko? Hahaha. Okay lang ba kayo? I only expressed my stand and my principles. Where’s our right to freedom of expression now? Kawawa naman ang Pilipinas. Hahaha,” kabahin anay sang iya Facebook post.
Sa record sang PNP, assigned si Fontillas sa District Personnel and Holding Admin Section halin sang February 20, 2025 apang nag-absent without official leave (AWOL) halin sang March 6.#
