ILOILO – Makigsapol si Carles, Iloilo Mayor Seigfredo Betita sa mga mangingisda kag mga punong barangay sang munisipalidad agud mapahanumdom sa ila ang Visayan Sea closure.
Sa interview sang Bombo Radyo kay Betita, iya ginpahayag nga kalabanan sang mga mangingisda ang posible gid nga maglapas sa kasuguan kon indi ma-id-idan kag indi ma-isa-isa patpat ang impormasyon.
Aminado si Betita nga apisar may mga opisyal na sang Bantay-Dagat nga nagapatrol sa kalalawran, may yara gihapon sang makalusot nga mga mangingisda.
Bangud sini, hugton kag istriktuhan ang mga lihok suno kay Betita agud masigurado nga wala sang makapangisda sa Visayan Sea bilang pagtuman man sa pagsulundan sang Bureau of Fisheries and Aquatic Resources (BFAR).
Bantayan man suno sa alkalde ang merkado kag pahanumdumon ang publiko nga indi magbakal sang mga isda nga ginadumilian subong.
Nahibaluan nga santu sa regulasyon sang BFAR, umpisa Nobyemre 15, may yara sang closure ang Visayan Sea, sa diin ginadumilian ang paghulik sang tatlo ka mga sahi sang isda: sardinas, mackerel, kag guma-a.
Tubtob Pebrero 15, 2020 ang breeding season sang nasambit nga mga isda
Nahibaluan man nga una na nga ginpahayag ni Remia Aparri, Regional Director sang BFAR Region 6, nga may patigayunon man nga market ban sa nasambit nga mga isda.
