Masobra duha ka oras nga ginpaidalom sa Yellow Alert ang Visayas Grid.
Sa ginpaguwa nga abiso, nag-umpisa ini alas singko sa hapon tubtub alas syete sa gab-i, kag ginkumpirma sang National Grid Corporation of the Philippines (NGCP) nga ginbawi ini sang 7:45 sang gab-i.
Ini ang una nga yellow alert nga gin-isyu sang subong nga tuig. Gina-isyu ang yellow alert kon kulang ang operating margin agud malab-ut ang contingency requirement sang transmission grid.
Suno sa grid operator, ginpasaka ang alert kasunod sang forced outage sa TVI Unit 1 nga may yara sang kapasidad nga 169 megawatts, kag PEDC Unit 2 nga may kapasidad nga 83.7 megawatts.
Ang TVI Unit 1 ang parte sang Therma Visayas Inc. coal-fired power plant sa Barangay Bato, Toledo City, Cebu sa Central Visayas. Sa pihak nga bahin, ang PEDC Unit 2 ang iya naman sang Panay Energy Development Corporation coal plant sa Iloilo City diri sa Western Visayas.
Magluwas sa sini, may 10 na nga daan ka power plants nga naka-forced outage subong nga Enero, apat halin sang 2025, tatlo halin sang 2024, duha halin sang 2023, kag isa halin sang 2021.
Dugang pa diri, may 21 ka mga planta nga naga-opera sa ginpanubo nga kapasidad nga nag-resulta sa kabug-usan nga 681.1 megawatts nga indi available sa grid.
Una na nga nagpaandam ang Department of Energy (DOE) nga posible maapektuhan sang tyempo ang Visayas kag Mindanao grids.
