Ginpamatud-an sang isa ka alumna sang Iloilo State University of Fisheries Science and Technology nga wala sang ano man ang posible makaupang sa paglab-ot sa handom.
Ini amo si Christel Surita nga rank no. 10 sa Licensure Examination for Professional Teachers (LEPT) – Elementary Level matapos makakuha sang 92.80% nga rating.
Sa interview sang Bombo Radyo kay Surita, iya ginpayahag nga madamo man ini sang mga pagpanghangkat nga naagyan bangud sang iya kondisyon sa panan-awan kun sa diin na-diagnose ini nga may ara sang congenital cataract apang wala ini nakapugong sa paglab-ot sang iya handom.
Suno kay Surita, dako nga bulig sa iya ang online videos sang tion nga naga review ini para sa board exam nga naghatag sa iya sang dugang nga impormasyon para sa iya nga preparasyon.
Pahayag pa ni Surita nga second year pa lang ini nag-umpisa na ini sa pagreview para sa iya nga Licensure Examination kag wala gid ini napaslawan bangud nakuha sini ang Rank 10 nga pwesto sa amo nga pasinawan.
Dako naman ang iya pagpasalamat sa Diyos kag sa tanan nga mga tawo nga nangin parte sang iya kabudlayan kag kadalag-an agud malab-ot ang iya handom.
Suno pa sa iya nga kabay pa nga mangin inspirasyon ang iya istorya sa iban mna nga tawo kag makahatag ini sang pagbag-o agud mangin manami man ang istorya sang ila kabuhi.
