ILOILO CITY – Indi makalalaton kag indi makamamatay ang Vitiligo.
Sa pagpaathag sang medical expert nga si Dr. Elvin Tiangha, ang Vitiligo ang isa ka skin condition kun sa diin amat-amat nga nagakadula ang pigment cells nga melanocytes nga amo ang nagahatag sang duag sa panit.
Suno kay Dr. Tiangha, makabig nga long term skin condition ang Vitiligo kag mahimo lamang nga maglaton paagi sa genes.
Ginpahayag ni Dr. Tiangha nga ang nasambit nga skin condition ang mahimo magtuhaw sa babayi kag lalaki apang mas madali nga makita ang white patches sa mga pasyente nga may dark skin.
Ang Vitiligo suno sa natungdan ang permanente nga skin condition apang mahimo ini nga mahagan-hagan paagi sa treatment kasubong sang pagbutang sang cream kag pagpaidalom sa phototherapy.
Makapaayo man nga likawan ang tuman nga pagpa-init kag ang pagpabutang sang tattoo.
Apisar nga indi makabig nga life-threatening, ginpahayag sang doktor nga may yara sang negatibo nga epekto ang Vitiligo sa social behavior kag self-esteem sang pasyente.
