Nagasuprer sang kasakit kag kahapdi ang isa ka vlogger sa Brgy. Simsiman, Calinog, Iloilo matapos nga ginsindihan ang kaugalingon sini para sa isa ka vlog.
Ini amo si Isaganijudyan Camare Canja ukon mas kilala sa tawag nga “Boy Negro”, residente sang nasambit nga lugar.
Sa interview sang Bombo Radyo kay Canja, iya ginpahayag nga bangud sa vlog, napaso gid ang iya lawas kon sa diin, naglab-ot sa 3rd degree burn.
Suno kay Canja, tunga sa litro ang iya ginbakal nga gasolina agud nga ipaligo kag imnon para sa iya content.
Ginpahayag man sini nga wala ini naglaum nga maglab-ot sa amo nga sitwasyon ang iya ginhimo bangud nagpreparar man ini sang tubig agud langoyan.
Bangud sa naagum nga paso, gilayon ini gindala sa ospital kag tubtob subong, nagapabilin nga ginabulong.
Nagpangayo man ini sang bulig sa iya mga supporters agud mabuligan siya sa iya sitwasyon subong.
Ginakasubo naman sang iloy ni Boy Negro ang natabo sa iya anak.
Suno kay Lucia Canja, iloy sang vlogger, iya ginpahayag nga madugay na sini nga ginasaway ang iya anak apang indi man sini mapunggan bangud sa iya kaugalingon nga desisyon.
Nahibaluan nga Grade 2 lamang ang gintapos ni Boy Negro kag antes nag-vlog, nagatrabaho ini bilang tricycle driver.
