Imbestigaran sang Kamara ang vloggers nga ginaalegar nagapalapta sang ‘fake news’ agud nga pakalainon ang quad committee ukon ang quad comm.
Suno kay mega-panel chairperson Rep. Robert Ace Barbers, magatukod ang Kamara sang Tri Committee para nga usisaon ini nga vloggers nga ginapatihan nga ginapondohan sang Philippine Offshore Gaming Operators (POGOs). Gin-ban na ang POGO diri sa Pilipinas apang may pila pa gihapon nga naga-operate.
Suno kay Barbers, magadihon ang tri-comm sang regulatory framework para mapunggan ang vloggers sa pagpalapta sang fake news kag disinformation. Wala sini ginpangalanan kun sin-o nga vloggers ang iya buot silingon
Suno pa sa kongresista, ang tuyo gid sang trolls amo nga magtuga sang kinagamo paagi sa pagpalapta sang sala nga mga impormasyon. Indi dapat magdaog ang trolls suno pa sa natungdan.
“The ultimate goal of the trolls is to create chaos and disorder by sowing false information, confusion, fear and slander their subjects. We must not let them win. Law and order must be preserved to ensure peace and stability in society,” kabahin anay sang iya privilege speech sang Disyembre 4.
Gin-request man sini ang National Bureau of Investigation (NBI) para matumod ang vloggers nga naga-engage sa amo nga aktibidad. Ginpahayag naman sang NBI nga mahimo manabat ang vloggers sa pag-isyu sang mga pahayag nga nagahaylo sang sedisyon.
Paathag sang ahensya, indi absolute ang freedom of expression.
Matandaan nga nangin bantog ang quad comm sa ila nga imbestigasyon batok sa POGOs kag mga personalidad nga naangot diri amo man sa mga imbestigasyon batok sa drug war kag alleged extrajudicial killings sa idalom sang termino ni anay Presidente Rodrigo Duterte.
