Ginkwestyon ni Iloilo City Vice Mayor Lady Julie Grace “Love” Baronda kon ngaa subong lang gindala ang issue nahanungod sa iya legislative power bisan madugay na nga yara sa mga komitiba sang Sangguniang Panlungsod ang iya mga proposed ordinances kag resolution.
Ini kasunod sa nangin privilege speech sa 34th Regular Session sang Sangguniang Panlungsod sang Iloilo City ni Councilor Romel Duron nga limitado ang legislative power sang bise alkalde.
Sa interview sang Bombo Radyo kay Vice Mayor Baronda, iya ginpahayag nga may 12 ka proposed ordinances kag isa ka resolution siya nga gin-submit nga tubtob subong pending pa sa gihapon sa mga komitiba.
Suno kay Baronda, madugay na nga nahibaluan sang mga konsehal ang iya mga gina-propose nga legislation rason nga ginakwestyon niya kon ngaa subong lang gindala ang argumento nga limitado ang legislative power sang vice mayor.
Ginkwestyon man niya kon ngaa ginduso ini nga issue sa tion nga wala siya sa Iloilo kag indi siya makahatag sang iya bahin, amo man nga wala sila sang kahigayunan nga makaistoryahanay sang matarong kag diretso.
Pahayag sang bise alkalde, daw kaangay nga ginakulbaan gid ang iban sini nga mga kaupdanan nga makapasar siya sang mga legislation, ilabi na kon ang mga ini para sa kaayuhan sang mga pumuluyo kag sang siyudad.
Ginalantaw man ni Baronda nga daw kaangay indi gusto sang iban nga may yara siya sang legislative accomplishments, kag amo man ang pampamulitika nga iya gid ginakasubo.
Ginpahayag man niya, indi man ini dapat tan-awon bilang iya personal nga accomplishment, bangod kon mapasar ang iya gina-propose nga ordinansa, accomplishment ini sang bug-os nga Sangguniang Panlungsod bilang isa ka legislative body.
Dugang pa niya, iya ginalantaw nga kaangay ginalimitar ang iya legislative function kag pag-silencing ukon pagpahipos bilang vice mayor sang syudad.
