Ginpakamalaot ni Iloilo City Vice Mayor Julie Grace Baronda ang nangin aktwason kag pagsabtanay sang mga konsehal sa 41st Regular Session sang Iloilo City Council kahapon nga adlaw, Oktubre 21, ilabi na bangud may mga kabataan nga nagtambong sang proceedings bilang kabahin sang Boys and Girls Week celebration.
Sa interview sang Bombo Radyo kay VM Baronda, iya ginpahayag nga indi maayo nga ehemplo sa mga kabataan ang ila nasaksihan bangud nakita nila mismo ang pangpamulitika sa real-time nga sitwasyon.
Suno kay Baronda sang iya na-istorya ang iya counterpart nga girl vice mayor, ginpahayag sini nga base sa iya eksperyensya sa parliamentary procedure, dapat nakasentro lamang ang diskusyon sa mga argumento kag indi sa personal nga pag-atake sa isa ka tawo.
Pahayag ni Baronda, masubo nga ang mga kabataan nga nagtambong ang mag-enjoy kuntani kag makatuon parte sa pagdumala sang city council, kabaliskaran ang ila nga nasaksihan kag ini ang indi gid manami nga eksperyensya para sa ila.
Matandaan nga una nga nagsabtanay sanday Councilor Sheen Marie Mabilog kag Councilor Romel Duron matapos nagpamangkut si Mabilog kay Duron kon nagapati ini nga may ginahimo nga ilegal ang mga vice mayor kag vice governor sa probinsya sang Iloilo kon nagapasar sila sang mga resolusyon ukon ordinansa.
Apang, wala ini direkta nga ginsabat ni Duron tubtob nga nagtuga sang pagbaylohanay sang komento sa isa kag isa.
Matandaan man nga nagsabtanay sanday Councilor Duron kag VM Baronda matapos nga naglango-lango si Duron kun sa diin nasaklaw ang bise alkalde sa ginhaboy nga tinaga ni Duron tubtob nga gintawag ni Baronda si Duron bilang isa ka arogante.
Ginpahayag pa ni Baronda nga dapat magpokus ang mga konsehal sa mga argumento kag sa isyu nga makapamaayo sa syudad kag sa mga Ilonggo imbes nga mag-personal nga mang-atake sa ila kaupdanan.
Dugang pa niya, ang mga kabataan ang makahangop na sang kun ano ang maayo kag indi nga mga ehemplo ilabi na sa politika, gani importante nga ipakita sang mga opisyal ang husto nga pagdumala kag pagrespeto sa isa kag isa.
