Gin-akusaran ni Vice Mayor Lady Julie Grace “Love-Love” Baronda ang mayorya sang Sangguniang Panlungsod sang Iloilo City nga ginapahipos ang mga miyembro sang oposisyon agud indi makapamangkot kag makapahayag sang pagsupak, sa tunga sang kontrobersiya nga may kaangtanan sa pag-adopt sang DILG Legal Opinion No. 95, series of 2025 kag sa paglimitar sang iya gahum bilang bise alkalde.
Suno kay Baronda, nagapati siya nga may kaangtanan sa politika ang mga tikang batok sa iya, ilabi na nga ginakwestyon niya ang madasig nga paghimo sang committee report nga ginpresentar ni Councilor Rex Marcus Sarabia.
Ginpahayag sang bise alkalde nga sa iya panan-aw, daw ginapili lamang sang mayorya ang ila panindugan, bangud wala nila ginsabat ang iya pamangkot kung may paglapas man sa layi ukon probisyon ang isa ka opisyal, nga ginatumod niya nga si Vice Governor Lee Ann Debuque.
Ginpaathag ni Baronda nga sa committee report ni Sarabia, ginpatuhuyan ang mga termino nga ultra vires ukon pag-obra nga wala sa legal authority, kag dereliction of duty ukon pagpabaya sa katungdanan.
Dugang pa sang bise alkalde, ginakwestyon niya kung ngaa sa sulod lamang sang 45 ka adlaw nahimo na ang committee report ni Sarabia, apang nagalibog ang iya ulo ngaa wala siya gina-imbitar para magpamati sang iban nga committee hearing agud makahatag siya sang legislations, maluwas lang kay Councilor Jose Maria “Nene” De La Llana.
Ginpahayag man ni Baronda nga ginatan-aw niya ini nga bullying kag paglimitar sa iya tingog nga maghambal para sa publiko.
“It’s already clear that if you’re not aligned with the Mayor, they will do everything they can to silence you,” suno kay Baronda.
Ginkwestyon man niya kung ano ang ginakahadlukan sang mayorya, bisan supermajority ini kag duha na lamang sila ni Councilor Sheen Marie Mabilog ang yara sa oposisyon.
Para kay Baronda, indi lamang ini personal nga isyu, kundi isa ini ka precedent nga posible magamit batok sa ordinaryo nga mga pumuluyo kung indi sila mag-uyon sa mga nagapungko sa posisyon.
Tungod sini, ginpahanumdom niya ang importansiya sang pagpili sang mga lider nga nagaserbisyo para sa kaayuhan sang kadam-an, sa baylo nga unahon ang personal nga interes.
By: Bombo Cyrene A. Nasis
