Pabor si Alimodian, Iloilo Vice Mayor Gefree “Kalay” Alonsabe nga may isa ka pa ka power distribution utility sa amo nga banwa bangud ginapahayag nga indi gid mapuslan ang serbisyo nga ginahatag sang Iloilo Electric Cooperative, Inc. 1 (ILECO 1).
Ginpahayag ini ni Alonsabe kasunod sang binulan na nga patay-sindi nga sitwasyon kag daw kaangay nga “Christmas lights” ang suplay sang kuryente bisan nga mainit man ukon maulanon ang tyempo sa Alimodian.
Sa interview sang Bombo Radyo kay Alonsabe, iya ginpahayag nga nagpanugyan siya sa iya mga kasimanwa nga palawigon pa gid anay ang pasensya subong kag kun wala gid sang pagbag-o sa serbisyo sang ILECO 1, diri na kag iduso nga pasudlon ang bag-o nga distribution utility.
Na-mensyonar sini ang More Electric Power Corporation (MORE Power) nga amo ang naga-serbisyo sa syudad sang Iloilo.
Una na nga nag-post si Alonsabe kun sa diin nagpaandam ini nga magalunsar sang signature campaign agud mapalab-ot ang palpak nga serbisyo sang ILECO 1 kay President Ferdinand “Bongbong” Marcos, Jr.
“Sobra na! Tama na! May uran man o bagyo kag mayad ang tiempo amo man guihapon ang inyo serbisyo. Di man ninyo ma please ang inyo tanan nga kunsumedorr pero, tani makita kag mabatyagan ninyo ang reklamo kang tawo kag ano ang inyo solusyon nga mapahaganhagan ang pa-ngakroy ka tawo sa inyo nga serbisyo. Di gani ninyo mapanindugan ang mga opisyales ka banwa nga nag patawag kaninyo sa konseho how much more ang ultimo nga tawo nga naga reklamo kaninyo?,” kabahin sang nangin post sini.
Una man nga ginpahayag sang bise-alcalde nga masami lang ginarason sang ILECO 1 amo nga may tuko, pispis, kag burador nga nagakalasab-it sa ila linya rason nga ginatunaan sang gulpiyada nga brownout sa banwa.
