ILOILO CITY – Gina-welcome ni Iloilo City Vice Mayor Jeffrey Ganzon ang sin-on man nga politiko nga luyag magbunggo sa iya sa May 2025 midterm elections.
Si Ganzon ang magapare-elect bilang bise alkalde sa masunod nga piniliay.
Sa interview sang Bombo Radyo kay Ganzon, iya ginpahayag nga ang Pilipinas ang isa ka hilway nga pungsod kag mahimo magpadalagan ang sin-o man nga kwalipikado nga indibidwal.
Suno kay Ganzon, kun pillion siya liwat sang mga pumuluyo, mapabugal sini nga wala siya naangot ukon sin-o man nga myembro sang iya pamilya sa korapsyon.
Sa posibilidad naman nga pagbunggu-anay nila ni Iloilo City Councilor Atty. Sedfrey Cabaluna, ginpahayag ni Ganzon nga wala man ini sang nakita nga problema.
Ginpahayag sini nga abyan man niya ang nagtaliwan nga amay ni Cabaluna kag ang iloy naman sini ang nakatrabaho sa Iloilo City Hall sang ang amay pa sang bise alkalde nga si Rodolfo Ganzon ang nagapungko bilang Mayor sang syudad.
