ILOILO CITY – Wala sang problema kay Iloilo City Vice Mayor Jeffrey Ganzon kun indi siya makapungko bilang officer-in-charge samtang nga indi makabalik sa City Hall si Mayor Jerry Treñas kasunod sang pagpaidalom sini sa angioplasty.
Sa interview sang Bombo Radyo kay Ganzon, iya ginpahayag nga sa iya pagkahibalo, gin-appoint sang alkalde si City Administrator Melchor Tan bilang officer-in-charge.
Suno kay Ganzon, indi niya gusto nga maapektuhan ang maayo nga working relationship niya sa alkalde gani nga sundon na lamang niya ini.
Pahayag niya, wala man siya nakibot sa amo nga desisyon ni Treñas.
Nagpasalig man ini nga indi maapektuhan ang pagbulig sang konseho sa executive branch samtang nga si Tan ang magapungko bilang officer-in-charge.
Base sa section 46 sang Local Government Code of the Philippines, sa tion nga indi maka-report ang city mayor bangud sang physical ukon legal reasons kaangay sang leave of absence, travel abroad kag suspension from office, ang vice mayor ang awtomatiko nga magatungod sang responsibilidad sang local chief executive magluwas lamang sa pag-appoint, suspend ukon pagpahalin sa mga empleyado.
Sa tion naman nga ang incumbent local chief executive ang nag-travel sa diin man nga lugar sa sulod sang pungsod nga indi maglapaw sa tatlo ka sunud-sunod nga adlaw, mahimo ini nga mag-designate sang officer-in-charge pinaagi sa isa ka sulat.
Kun mapaslawan naman ang local chief executive nga mag-issue sang authorization, sa ika-apat nga adlaw, dapat nga magpungko na ang nagasunod sa iya sa posisyon.
Magluwas diri, indi mahimo ang local chief executive nga magpahanugot sa iban nga local official nga magbulos sa iya responsibilidad magluwas sa vice governor, city ukon municipal vice mayor, ukon ang highest ranking Sangguniang Barangay member.
