Nagtaliwan na sa edad nga 90-anyos ang voice actress nga amo ang naghatag sang kabuhi sa karakter sang robotic cat nga si Doraemon sa Japanese anime nga may amo man nga pangalan.
Ini amo si Nobuyo Oyama nga napatay sang nagligad pa nga Septyembre 29 bangud sa katigulangon.
Nagpangayo man sang pasensya ang “Actors 7” agency sa atrasado nga statement sa iya kamatayon kag nagpasalamat man sa tanan nga nagpalangga kay Oyama.
“We would like to express our sincere gratitude for the kindness you extended to the deceased during her lifetime,” kabahin sang statement.
May ginpatigayon man nga pribado nga haya nga ginkadtuan sang mga himata kag abyan sang nagtaliwan.
Ang “Doraemon” television show ang na-ere halin sang 1979 tubtub sang 2005 kag isa sa tatlo ka shows sa larger Doraemon franchise nga nangin popular sa regional markets pati sa Hong Kong, Vietnam, kag Pilipinas.
Lakip sa franchise nga ini ang animated films, video games, music albums kag manga series.
Si Oyama ang nabun-ag sa Tokyo, Japan kag antes ini nangin boses ni Doraemon, nangin kabahin man siya sang puppet show nga “Boo Foo Woo” nga popular man sa Japan halin sang 1960 tubtub sang 1967.
Sang Hulyo, matandaan nga nagtaliwan man ang 88-anyos voice actor nga si Noriko Ohara nga amo naman ang boses sa likod ni Nobita sa Doraemon.
