Gin-ulan sang nanari-sari nga reaksyon ang video nga naglapta online nga nagapakita sang prusisyon sa Barangay Calvario, Meycauayan, Bulacan kadungan sang Byernes Santo.
Indi ang prusisyon mismo ang ginmuno sang netizens kundi ang voice over.
Sa baylo nga may live prayer leader, nagagwa kun pamatian nga ang rosaryo nga ginapatunog sa portable sound system ang gin-generate paagi sa artificial intelligence ukon A.I.
“In 200 meters, turn left, Amen,” kabahin sang komento sa Facebook. Sabat sang isa: “*lumabas bigla yung CEO.”
Madamo naman ang nagpahayag nga tinamad kag indi seryoso sa pagpangamuyo ang paggamit sang A.I.
“Hindi tinipid pero tinamad hahaha,” pahayag sang isa samtang may mga nagasiling naman nga daw nagalantaw lang sila sang random reels sa ila feed.
May mga naham-ot kag nag-share sang videos, samtang madamo naman ang nagpabutyag sang pagkadismaya ilabi na nga parte ini sang Holy Week celebration.
“Minus 10 kayu sa langit.. apaka tamad nyu manalangin!,” komento pa sang isa ka netizen.
Ginahulat pa ang statement sang mga opisyal sa Barangay Calvario, Meycauayan, Bulacan agud klaruhon kun naggamit sang pre-recorded, non-human voice kadungan sini nga Catholic tradition.
