Wala gin-aprubahan sang Commission on Elections (COMELEC) en banc ang hingyo sang pila ka mga senador nga palawigon sa sulod sang isa ka bulan ang voter registration period agud makahingagaw sa pagpa-rehistro ang mga pumuluyo nga na-lockdown kasunod sang lapnagon nga COVID-19.
Sa interview sang Bombo Radyo kay Jonathan Sayno, Election Officer II sang Commission on Elections (COMELEC) -Iloilo City, iya ginpahayag nga sa mga lugar nga napaidalom sa Enhanced Community Quarantine (ECQ) kag Modified Enhanced Community Quarantine (MECQ) kaangay sang syudad sang Iloilo, sirado ang opisina sang ahensya sa diin naka-work from home ang mga empleyado.
Apang gin-desisyunan sang COMELEC nga i-extend ang registration hours kag ipabilin nga bukas ang opisina kun Sabado kag holidays.
Suno kay Sayno, kun mapanubuan ang quarantine status sang syudad kag liwat nga makabukas ang opisina sang COMELEC, mahimo nga makaparehistro ang mga pumuluyo sa extended registration hours.
Apang pinal na ang desisyon sang ahensya nga tubtob lang sa Septyembre 30, 2021 ang voter registration period.
