Ginbuyagyag ni Vice President Sara Duterte nga ang confidential funds sang Department of Education (DepEd) sa iya pagpanguna sang una ang gin-gamit sa pag-imbestigar sang ginapatihan nga lapnagon nga kurapsyon sa sulod sang ahensya.
Lakip na ang P2.9-billion nga kontrata para sa mga laptop nga outdated kag overpriced.
Ini nga pahayag ni Duterte ang kabaliskaran sa una nga deklarasyon sang DepEd sang nagligad nga tuig, kun sa diin ginpahayag nga wala sila sang impormasyon kun paano gingasto ang P112.5 million nga confidential funds para sa tuig 2023.
Matandaan nga nagpamalibad si Duterte nga isugid ang detalye sang paggasto sang secret funds kag ginpasa ang responsibilidad sa Commission on Audit (COA) nga amo lang ang otorisado nga magbuyagyag sang impormasyon kun angot diri.
Sang Marso 2022, gin-flag sang COA ang DepEd sa pagpamuno ni anay Secretary Leonor Briones bangud sa kontrobersyal nga pagbakal sang P2.4 billion nga balor sang mga laptop para sa mga manunudlo nga nagaserbe sa online learning sang 2021 sa tunga sang COVID-19 pandemic.
Ginklaro ni Duterte nga sa ila ginpatigayon nga imbestigasyon, nahibaluan nga ang actual nga pagbakal sang mga laptop ang yara sa sulod sang Procurement Service sang Department of Budget and Management (PS-DBM), indi sa DepEd.
Suno pa sa Bise Presidente, wala sila nangin madinalag-on sa pag-blacklist sa mga kompaniya kag nagsalig lamang sa mga rekomendasyon sang COA kag sang Senate blue ribbon committee nga naga-invistigate sang amo nga isyu.
