Nagapanindugan si Vice President Leni Robredo nga indi epektibo ang bilateral talk sa tunga sang Pilipinas kag China agud nga mahatagan na sang solusyon ang away sa West Philippine Sea.
Suno sa bise presidente, kun bilateral ukon kun ang Pilipinas kag China lang ang naga-istoryahanay, daw kaangay nga naga-negosyar ang pungsod halin sa isa ka inferior nga posisyon bangud indi man manegar nga mas gamay ang Pilipinas ipaanggid sa China.
Nagapati ang bise presidente nga ang mas kinahanglan subong ang multilateral talk; buot silingon, may yara sang iban nga mga pungsod nga magapakigbahin sa pag-istoryahanay. Ini nga mga pungsod ang may kaangay man nga concern ukon problema nga luyag ma-address.
Ini man suno sa iya ang panugyan sang mga eksperto ilabi na bangud disbentaha para sa Pilipinas ang bilateral talk.
Suno pa kay Robredo, bisan si Presidente Rodrigo Duterte gani ang nagaako man nga kulang ang Pilipinas sang resources sa isyu sa West Philippine Sea — rason nga mas daku ang pagkinahanglan sang multilateral talk agud maproteheran ang interes sang Pilipinas.
