Bwas nga adlaw, Marso 16, ginalauman nga magpasa na si Vice President Sara Duterte sang iya nga sabat sa duha ka impeachment complaints batok sa iya matapos gindeklarar ini nga sufficient in form and in substance.
Ginpahayag ni House Committee on Justice member kag Bicol Saro Representative Terry Ridon nga matapos na ang 10 ka adlaw nga ginhatag sang komite sa Bise Presidente subong nga weekend para sabton ang mga reklamo.
Pananglitan magpasa sang sabat si VP Sara sa Lunes, ginsiling ni Ridon nga hatagan sang tsansa ang bahin sang mga mamalidha nga nag-endorso sa mga reklamo nga impeachment kag pagkatapos hatagan man sang kahigayunan si VP Sara nga magsumite sang iya nga rejoinder.
Samtang, suno kay Rep. Ridon, kun magsumite sang sabat ang Bise Presidente, tumuron sang Justice Committee kun “sufficient in grounds” ang impeachment complaints kag patigayunon ang hearing proper sa Abril 8.
Ginpaathag man sang mamalidha nga mahimo mapanubo ang dalagan sang impeachment process kun indi magpasa sang sabat si VP Sara bwas.
Hugot man nga ginpanginwala ni Ridon ang akusasyon ni VP Sara nga isa ka “fishing expedition” ang impeachment proceedings batok sa iya.
Samtang, natalana patigayunon ang sunod nga hearing sang Justice Committee sa Miyerkules, Marso 18.
Suno kay Rep. Ridon, talakayon diri ang mosyon ni Rep. Chel Diokno kaangot sa posible nga conflict of interest sang duha ka abogado ni VP Sara nga sanday anay Education ASec. for Procurement Atty. Reynold Munsayac kag anay DepEd Spokersperson Michael Poa.
