ILOILO CITY – Ginpasalamatan sang Lakas–Christian Muslim Democrats si Vice President Sara Duterte sa serbisyo nga ginhatag sini sa partido bilang party chair, kag sa pagbulig sa pagtukod sang Unity Team nga nagatuyo nga magdala sang maayo nga pagbag-o sa Pilipinas.
Sa ginpagwa nga statement sang partido pinaagi kay Party Secretary General Congressman Joboy Aquino, ginrespeto sang grupo ang rason sang bise presidente sa pagbiya sa political party.
Dugang pa sang grupo, ginasuportahan nila ang panawagan ni Duterte sa tanan nga political leaders nga mag-isa sa pagsuporta kay President Ferdinand Marcos, Jr., kag sa tanan nga nagtrabaho para sa kadalag-an sang sini nga administrasyon para sa benepisyo sang publiko.
Kung madumduman, kaina sang aga, nagpagwa man sang statement si Duterte nga nag-resign na siya sa grupo.
Wala man niya gintul-id kun ano ang rason sang iya pagbiya.
