Nakabalik na sa Pilipinas si Vice President Sara Duterte matapos ang masobra tatlo ka semana nga pagtinir sa The Netherlands kun sa diin naka-detain ang iya amay nga si former President Rodrigo Roa Duterte bangud sa kaso sini sa International Criminal Court (ICC).
Suno sa Office of the Vice President (OVP), nag-abot si Sara sa Ninoy Aquino International Airport (NAIA) kuwatro minutos antes ang alas dies kagab-i sakay sa Emirates Airlines flight no. EK 334.
Pahayag sang opisina, sabton sang bise-presidente ang pila sa nagapanguna nga mga isyu nga naangot sa iya sa masunod nga inadlaw.
“The Vice President is expected to address any pertinent matters in the coming days,” suno sa statement.
Matandaan nga Marso 12 sang nagpadulong si Sara sa The Hague nga isa ka adlaw matapos gin-aresto ang anay punong ehekutibo kag gindala sa Europa sa gahum sang arrest warrant halin sa ICC.
Si Sara man ang una nga myembro sang pamilya Duterte nga nag-abot didto sa European country agud tatapon ang kinahanglanon sang iya amay nga yara sa Scheveningen Prison. Una na sini ginsiling nga magapauli lamang siya kun makumpleto na ang legal team sang former president, kag kun may iban na nga katapo sang pamilya nga didto na sa The Hague.
Nakumpirma naman nga ang magapungko nga chief legal counsel amo ang beterano nga ICC defense lawyer nga si Nicholas Kaufman nga isa ka British-Israeli. Ang abogado lamang ang ginatugtan sang ICC nga maka-istorya kay Duterte sa “legal matters” samtang nagahulat ini sa confirmation of charges sa international tribunal nga naka-schedule sa Septyembre 23, 2025.
Samtang didto sa Netherlands, ginsiling ni Sara nga gina-himo gihapon sang OVP ang trabaho sini kag mahimo man siya maka-function online. Ginklaro man sini nga KKB ukon “kanya-kanyang bayad” sila sa ila nga galastuhan sa pagtinir sa amo nga pungsod.
Magluwas sa Duterte arrest, isa sa ginahikot ni Sara amo ang impeachment trial batok sa iya nga posible mag-umpisa sa katapusan sang Hulyo subong nga tuig. Matandaan nga gin-impeach siya sang House of Representatives sang Pebrero 5 bangud sa madamo nga grounds lakip na ang alleged misuse sang confidential funds. Napasaka na ang articles of impeachment sa Senado apang naka-session break subong bangud sa eleksyon.#
