Wala na nagalaum si Vice President Sara Duterte nga makabaton sang hustisya ang kaso sang iya amay nga si anay Presidente Rodrigo Duterte sa idalom sang subong nga administrasyon.
Sa isa ka interview, ginsuhestyon sang Bise Presidente nga indi na niya makita nga makabaton sang nagakaigo nga hustisya kag due process ang kaso sang iya amay gikan sa gobyerno sang Pilipinas bangud sa ginaalegar extraordinary rendition sang administrasyon ni Pres. Ferdinand Marcos Jr sa anay presidente.
Kasunod sini, naghingyo ang Bise Presidente nga kontani indi na ini matabo sa iban nga mga Pilipino, nga suno sa iya amo ang rason kon ngaa ginapatigayon ang Senate hearings angut sa proseso sang pagdakop kay FPRRD.
Suno sa iya, paagi sa sini nga mga hearing, ang Senado makaangkon sang bastante nga mga pagsulundan kag makahimo sang mga kasuguan agud mapunggan ang mga amo nga sahi sang mga sitwasyon nga masulit.
Samtang luyag karon ni FPRRD nga mapadasig ang kaso bangud luyag sini nga makapauli sa Pilipinas.
Suno kay VP Sara, ginpahayag sang anay presidente nga tigulang na siya kag mahimo nga kuhaon sa bisan ano nga oras, kag ginhatagan pagtamod nga kun matabo ini, luyag niya nga mapatay sa iya kaugalingon nga pungsod.
