Gindepensahan ni Vice President Sara Duterte ang iya lead defense counsel nga si Atty. Sheila Sison, batok sa mga akusasyon sang bullying halin sa private prosecutor sa impeachment trial.
Ini isa ka adlaw matapos gintawag ni private prosecutor Lorna Kapunan si Sison bilang bully kag gin-akusahan nga wala sini ginatahan ang prosecution kag senator-judges matapos ginlaragway sang defense ang impeachment proceedings bilang “persecution.”
Suno kay VP Sara, ang pagtawag ni Lorna Kapunan sa defense counsel bilang bully ang kaangay nga pagtawag kay David bilang aggressor batok kay Goliath.
Suno sa iya, ini isa ka mahapos nga paagi agud pakalainon ang tawo nga nagapangapin batok sa mga tawo nga nagapadayaw sang ila politikal nga gahom.
Dugang ni Duterte, ginahimo lamang ni Sison ang iya trabaho kag madamo na ini nga ginsakripisyo para sa pagpreparar sang depensa.
