ILOILO CITY- Ginhingyo ni Vice President Sara Duterte sa Supreme Court nga i- dismiss ang petitions nga gin- file sang pila ka mga indibidwal batok sa kontrobersiyal nga P125 million confidential funds sang iya opisina.
Sa consolidated comment nga gin-file sang abogado nga si Atty. Estelito Mendoza sa korte suprema, ginsiling sang Vice President nga wala sa bisan ano nga petisyon ang nakapresentar sang aktwal nga kaso ukon kontrobersya ukon nakaalegar sang legally demandable kag enforceable right.
Suno kay Duterte, ang petitions ang lunsay apprehension kag spekulasyon lang tuhoy sa contingent funds ukon confidential funds.
Nahibaluan nga separado nga petisyon nga nagakwestiyon sang legalidad sang funds ang gin- file sang grupo sang mga abugado nga sanday Christian Monsod kag Howard Calleja, kag ACT Teachers Party-list sa Supreme Court.
Ginpangabay man nanday Monsod kag ACT Teachers sa petitio nga ibalik sang Office of the Vice President ang P125 million funds sa national treasury.
Ang pondo nagpaibwal sang kontrobersiya kasunod sang pagsaylo sang P125 million sang Office of the President pakadto sa Office of the Vice President sang 2022.
Sa iya consolidated comment, ginpahayag ni Duterte nga luyag sang iya opisina nga magdala sang mga serbisyo nga malapit sa publiko paagi sa satellite offices sa pungsod.
Gintumod sang Department of Budget and Management ang funds nga i- release sa Office of the Vice President ang magahalin sa Contingent Funds sang General Appropriations Act.
Kasunod sang rekomendasyon sang Budget Department, gin-grant ni President Ferdinand Marcos, Jr. ang pag-release sang pondo sa Office of the Vice President.
