Liwat nga nagpangabay si Senator Ronald “Bato” Dela Rosa sa Balaan nga Espiritu nga ubayan sila nga mga senador para sa natalana nga pagbotohay kaangot sa impeachment case batok kay Vice President Sara Duterte.
Si Bato ang nagpanguna sa pagpangamuyo sang nagbukas ang Senado sang regular session kahapon, Agusto 4.
Lakip sa ginpangamuyo sang senador amo nga indi sila madala sang kaakig ukon kaugot kag indi man sila madala sang ila “personal alliances” ukon “bias.”
“We ask you, Holy Spirit, to feel and move us in our debates and discussions on various issues of national interests, including the recent Supreme Court ruling on the impeachment of Vice President Sara Duterte,” pahayag sang long-time Duterte ally.
“May we not be ruled by our anger and hatred, not even by our personal alliances and biases,” he said, “Instead, may we be guided by the clarity and wisdom that only your spirit can provide.”
“Grant us unity in our deliberations that we may walk together in the pursuit of what is right and life-giving for our institution, our nation, and our world,” dugang sini.
Matandaan nga sang Hunyo, ginpahayag man ni Bato nga gin-guide siya sang Holy Spirit sang ginduso sini ang pagbasura sang impeachment case batok kay Duterte.
Ginhinambit man sini nga ang Holy Spirit man ang nag-ubay sa Supreme Court sang gindeklarar sini nga unconstitutional ang impeachment complaint sang Kamara batok sa bise-presidente.
Buwas, Agusto 6, natalana nga magtipon ang mga senador kag magbotohay kaangot sa amo nga desisyon sang Korte Suprema kag kun magasunod bala sila sa amo nga ruling.
Sa bahin sang Kamara, may yara sang motion for reconsideration nga gin-file kahapon, Agusto 4, agud hingyuon sa High Court nga baliskadon ang desisyon.#
