Ginklaro ni Senate Majority Leader Joel Villanueva nga indi siya mag-request sang special session sa Senado agud nga mapadasig ang impeachment trial batok kay Vice President Sara Duterte.
Apang suno sa senador, kun halimbawa may yara sang hingyo si President Ferdinand “Bongbong” Marcos Jr. sa Kongreso nga magpatigayon sang special session, handa siya nga magsunod.
“To answer your question, I myself will not ask for it, but if the President asks for it, I will comply willingly,” sabat sini sa interview.
Sang Huwebes sang hapon matandaan nga ginsiling ni Marcos nga bukas siya sa pagpatawag sang special session kun may pormal man nga request ang mga senador nga magpatigayon sang impeachment proceedings paagi sa special session.
Ini bangud naka-session break subong ang Kongreso kaangot sa midterm elections kag natalana nga mag-resume sa Hunyo 2, 2025.
Sang Miyerkules, 215 ka mga mamalidha ang nagpirma para ma-impeach sa Kamara si Sara. Si presidential son Rep. Sandro Marcos ang una nga signatory kag si House Speaker Martin Romualdez naman ang katapusan nga nagpirma.
Kahapon, Pebrero 7, may yara sang House release nga nagsaad nga may 25 pa gid ka dugang nga representatives nga nagpirma man para sa impeachment — buot silingon, 240 na subong ang complainants halin sa Kamara.
Yara subong ang bola sa Senado para sa patigayunon nga impeachment trial.
