Bukas si President Ferdinand Marcos, Jr. sa pagpatawag sang special session sa Senado agud nga maistoryahan ang impeachment batok kay Vice President Sara Duterte.
Suno kay Marcos, himuon niya ini kun maghingyo man sa iya ang mga senador ukon mismo si Senate President Francis ‘Chiz’ Escudero.
“If the senators ask for it, yes,” suno sa chief executive sa briefing sa Malacañang.
Apang halangpon suno sa presidente nga kun wala sang request, buot silingon, masako pa ang senado sa iban nga mga bagay kag indi pa sila handa sa impeachment trial.
Myerkules sang gab-i sang nag-adjourn ang session sa Senado apang wala sang tinimok-timok sa articles of impeachment batok kay Duterte matapos nga gin-impeach ini sang Kamara sang amo man nga adlaw.
“Again, sila ang magde-decide. Hindi kami ang nagde-decide nito. We – if the Senate President calls me up on the telephone, the senators, kinausap ko ‘yung mga senador kung puwede bang mag-special session?” “Sure.” Gagawin ko. Pero kung wala silang request na ganoon, ibig sabihin may iba pa silang ginagawa. They are not yet ready,” suno kay Marcos.
Kun basehan naman ang statement ni Senate President Chiz Escudero kahapon, sa legal nga basehan suno sa iya, indi mahimo ang impeachment trial samtang naka-session break ang Kongreso.
Pahayag sini, posible nga matabo ang trial pagkatapos sang May 2025 elections kag posible nga madesisyunan sang bag-o nga grupo sang lawmakers. Dugang sini, ang pinaka-temprano nga petsa nga makahulag ang Senado amo ang Hunyo 2 nga amo ang pag-resume sang session.
Sandy anay Bayan Muna Representatives Teddy Casiño kag Neri Colmenares ang nagpanawagan naman kay Escudero nga untatan na ang pagpasa-pasa sang bola sa impeachment kay Duterte.
Dapat suno sa anay mga kongresista nga tugutan na sini ang Senado nga himuon ang ila nga constitutional duty nga mag-convene sa impeachment court insigida matapos nga nabaton ang complaint halin sa Kamara.
Ginhangkat man ni ACT Teachers party-list Rep. France Castro si Escudero nga maghulag na kaangot sa amo nga impeachment.
Matandaan nga 215 sa 306 ka mga mamalidha ang nag-suporta sa bag-o nga impeachment complaint batok kay Duterte nga amo ang rason sa pagpasaka sini nga reklamo sa Senado para sa trial nga posible maga-resulta sa pagkakas sa iya sa pwesto. Base sa House resolution, nagkomiter si Sara sang “violation of the constitution, betrayal of public trust, graft and corruption, and other high crimes”.#
