Nanindugan ang kampo ni Vice President Sara Duterte nga indi siya mahimo mapasakaan sang kaso nga grave threats samtang nagapadayon ang iya impeachment trial.
Suno sa iya abogado nga si Atty. Paul Lawrence Lim, bilang isa ka nagapungko nga impeachable officer, indi dapat mapasakaan sang kaso si Duterte para sa isa ka ginapahayag nga offense nga kabahin man sang impeachment case.
“Equally important, as a sitting impeachable officer, the Vice President may not be prosecuted for an alleged offense that is also the subject of an impeachment case,” suno kay Lim sa isa ka statement.
“Given these serious legal issues, the Vice President will exercise all available legal remedies in due course,” dugang niya.
Ini nga pahayag ang kasunod sang kumpirmasyon sang Department of Justice (DOJ) nga ginpasaka na ang kaso nga grave threats batok kay Duterte sa Quezon City Regional Trial Court.
Ang gin-file amo ang one count sang grave threats sa idalom sang Article 282 sang Revised Penal Code nga kaangot sa Cybercrime Prevention Act. Pananglitan may ipaguwa nga arrest warrant, naka-set ang pyansa sa P120,000.
Nag-ugat ini sa pahayag ni Duterte sang 2024 kun sa diin nagsiling siya nga kun may matabo nga malain sa iya, may nasugo na siya nga isa ka tawo nga patyon sanday President Ferdinand Marcos Jr., First Lady Liza Araneta-Marcos kag anay House Speaker Martin Romualdez.
Matandaan nga sa grave threat man naka-sentro ang Article IV sang impeachment nga amo ang una nga gin-istoryahan sa trial sa impeachment court. Nakip ini sa akusasyon sang betrayal of public trust.
Sabat naman ni Justice spokesperson Polo Martinez, indi dapat maapektuhan sang nagapadayon nga impeachment proceedings ang separado nga criminal case batok sa Bise Presidente.
“Procedurally speaking, the conduct of a criminal case in the RTC QC should not be affected by the ongoing impeachment proceeding, and that applies vice versa,” suno sa spokesperson.
Suno kay Martinez, legal nga argumento lamang sang kampo ni Duterte ang ila posisyon kag dapat ini ipresentar kag husayon sang korte.#
