Nagapati si Vice President Sara Duterte nga wala na sa Davao City si Pastor Apollo Quiboloy nga amo ang leader kag founder sang Kingdom of Jesus Christ (KOJC).
Pahayag ini ni Sara samtang naglapaw na sa isa ka semana ang pagpangita sang mga pulis sa sulod sang compound sa Buhangin, Davao City para makita si Quiboloy kag iya mga kaupdanan — mag-utod nga sanday Ingrid kag Cresente Canada, Jackielyn Roy, kag Sylvia Cemañes nga lunsay man may arrest warrants.
Suno sa bise-presidente, kalawig sang tiyempo nga posible ginpanumdom gid sang pastor ang paghalin.
“Mahaba ‘yung panahon na pwede siyang umalis na sa Davao City, dahil mahaba din ‘yung grandstanding na nangyari doon sa Senate committee hearing,” pahayag sini. “So napakataas ng time na pwede niyang pag-isipan kung allis na ako o hindi. Isa din ‘yun sa dapat pag-isipan ng administrasyon.”
Naglahog pa ini nga posible nagpalangit na ang pastor. “One guess kung nasaan si Pastor Quiboloy? Nasa langit na siya.”
Nagapati man ang bise-presidente nga nagkomiter na ang mga pulis sang abuse of authority sa pag-serbe sang warrant of arrest batok kay Quiboloy.
Gin-athag sini nga ang korte ang may kinamatarong nga magtumod kun ano ang violation, apang sa iya opinyon suno sa iya, dapat kuntani nga madasig lang ang pagserbe sang warrant apisar sang kadakuon sang compound.
“Pero kung opinion lang nako ang inyong pangutan-on, definitely, dunay abuse of authority dinha. Di na nato kinahanglan isa isahon pa ang nakita nato nga kalapasan nga nabuhat para lang mag-implement og search warrant,” pahayag sini.
Nagtambong man si Sara sa 39th anniversary sang KOJC kagab-i sa sulod mismo sang compound kun sa diin gin-updan sini ang mga miyembro sang religious group sa prayer kag worship.
Nagapati ang bise-presidentE nga ang iya pagbisita sa kontrobersyal nga simbahan ang indi man mapulitika bangud isa siya ka Davaoeño kag siya man ang vice president.#
