Wala pa man nakabutwa si Vice President Sara Duterte may kaangtanan sa pila ka mga kontrobersiya sang ini pa ang nagapungko nga tiglikom sang Department of Education, naukayan na naman ang isa ka bag-o nga iregularidad sa bidding sang ahensya sa P1.6-B nga balor sang laptop.
Ini matapos ginbuyayag ni House Assistant Majority Leader Jil Bongalon, vice chairman sang House of Representatives’ committee on appropriations, ang nahanungod sa ginaalegar iregularidad sa ginpatigayon nga hearing sang proposed P793.18-billion budget sang DepEd para sa 2025.
Ginhingyo ni Bongalon nga maimbestigaran ang bidding process sang DepEd para sa pagbakal sang laptop kag iban pa nga electronic device sa idalom sang Computerization Program.
Suno kay Bongalon, posible nga “rigged” ang ginhimo nga bidding para sa pagbakal sang laptops nga nagabalor sang P8 billion nga duha ka beses ginpatigayon.
Sa amo nga budget hearing nausisa ni Bongalon kun ngaa apisar nga paborable na sa gobyerno ang nauna nga bidding, naghiwat pa sang panibag-o nga bidding nga may 1 percent nga variance nga nagakahulugan nga nagtaas na ang presyo sang laptop.
Paathag ni DepEd Undersecretary Gerard Chan, sa una nga bidding, duha ang na-award nga kontrata para sa 16 lots kag ang 14 nga na-disqualify ang gintugutan nga mag re-bid.
Suno kay Bongalon, sa una nga bidding, may 24% nga variance apang sang yara na sa ikaduha, 1% na lang ini nga nagresulta sang pagkadula sang P1.6 billion sa gobyerno.
Gin-ako naman si Chan, nga indi niya masabat sang husto ang mga pamangkot ni Bongalon bangud indi siya ang nagapungko sa pwesto sang natabo ini.
Dugang niya, lunsay indi na man konektado sa DepEd ang mga opisyal nga namuno sa amo nga bidding process.
Wala pa sang sabat si Vice President Duterte sa amo nga akusasyon.
Si Duterte ang namuno sa DepEd humalin sang June 2022 tubtob sa iya resignation sang June 2023 matapos nabungkag ang ila alyansa ni President Ferdinand Marcos Jr.
Siya ang ginbuslan ni former senator Sonny Angara, nga amo naman ang nagtambong sa budget deliberations agud depensahan ang 2025 budget proposal nga P793.1 billion sang ahensya.
