ILOILO CITY – Pasidunggan sang siyudad sang Iloilo ang 15 ka mga outstanding nga Ilonggo kadungan sa ika-80 nga Charter Day sang Iloilo City.
Lakip sa mga napilian ang Vice President kag Chief Operating Officer (COO) for AM Division sang Bombo Radyo Philippines nga si Mr. Herman Z. Basbano, Miss Earth 2015 Angelia Ong, Supreme Court Associate Justice Francis Jardeleza, rising basketball star nga si Keifer Ravena kag ang Grammy kag Tony winner nga si Jhett Tolentino.
Sa interview sang Bombo Radyo Iloilo, ginpahayag ni City Tourism Officer Junel Ann Divinagracia nga napili-an nga pasidunggan si Bombo Herman para sa Radio Broadcasting and Management Category tungod sa kontribusyon sa pagpalayag sang balita, sa diin bisan sa iban nga pungsod mabatian ang Bombo Radyo ilabi na sa mga Overseas Filipino Workers (OFW).
Dako man suno sa iya ang nabulig sang Bombo Radyo sa pagduso sa siyudad sang Iloilo agud mangin progresibo kag isa sa mga instrumento sini si Bombo Herman.
Si Mr. Basbano ang 38 na ka tuig sa broadcast profession sa no. 1 radio network sa Pilipinas, ang Bombo Radyo Philippines.
Si Bombo Herman ang national president subong sang Kapisanan ng mga Brodkaster ng Pilipinas (KBP) kag sa sulod sang siyam ka tuig, nangin chairman kag presidente sang KBP.
Pila sa mga proyekto kag adbokasiya sini amu ang pagduso sang press freedom kag freedom of expression, pagtatap sang dunang-manggad gani ginlunsyar ang Oplan Broadcastreeing sang KBP, presidential kag vice presidential debate sang 2016 election election kaupod ang Commission on Election.
Si Mr. Basbano ang tag-iya man sang Amazing View Mountain Resort and Pilgramage Destination nga ginpasidunggan sang Department of Tourism bilang isa sa duha sa pinakamanami nga resort sa Laguna.
Ang kadalag-an nga ini suno kay Mr. Basbano ang iya nga nalab-ot sa bulig sang Bombo Radyo kag sa pagpati sa pagkamapainubuson, paghimakas, pagkatampad kag pagpasalamat ukon pagkilala sa mga grasya nga nabaton.
Ginpasalamatan ni Mr. Basbano ang iya pamilya, si Dr. Rogelio Florete, chairman sang Bombo Radyo Philippines kag ang pamilya Florete, sa iya kadalag-an sa kabuhi.