Naglab-ot sa 43,000 ang benepisyaryo sang Walang Gutom 2027: Food Provision through Strategic Transfer and Alternative Measures Program (Food STAMP) sa Western Visayas apang lunsay ini halin sa Negros Occidental.
Sa interview sang Bombo Radyo kay Atty. May Rago-Castillo, information officer sang Department of Social Welfare and Development (DSWD) Region VI, iya ginpahayag nga ang household beneficiaries sang 31 ka local government units sa amo nga probinsya ang maka-avail sang P3,000 nga monthly food credits sa sulod sang tatlo ka tuig ukon tubtub sa 2027.
Ini nga 43,021 households amo ang natumod nga most food-poor.
Kada household ang ginhatagan sang electronic benefit transfer (EBT) card nga mahimo magamit sa pag-redeem sang food package kada bulan sa sulod sang 36 ka bulan.
Gin-accredit man sang talatapan ang pila ka retailers sa kada local government unit para maka-suplay sang food products sa household beneficiaries.
Ang Food Stamp Program naestablisar paagi sa Executive Order No. 44 ni President Ferdinand “Bongbong” Marcos Jr. sa tuyo nga mabuligan ang away sang mga pumuluyo batok sa kagutom. Kabahin ini sang anti-poverty and anti-hunger campaign sang national government.
