ILOILO CITY – Ginpanginwala sang Liberal Party nga may mga bayaran sila nga trolls para magpalapta sang fake news kag propaganda batok sa Duterte administration.
Ginpahayag ni Sen. Francis Pangilinan nga amo man ang presidente sang LP, wala sila sang pondo para magsuweldo sa trolls.
Sa meeting lang sang partido nila suno sa senador, nabudlayan na sila.
Maathag suno kay Pangilinan nga gobyerno ang nagapalapta sang fake news.
Suno sa senador, may direkta nga kaangtanan ang mga appointees sang administrasyon, sa mga nagapalapta sang sala nga impormasyon.
May yara suno sa senador sang 26 ka mga peke nga websites nga naga-apin sa Duterte administration kag dugang nga 300 ka mga sites nga nagapalapta man sang fake news.
Dako nga kuwarta suno kay Pangilinan ang kinahanglan para mapalakat ang mga sites nga ini.
May pattern man suno sa senador ang mga trolls bangud kun Sabado kag Dominggo nga wala sang opisina, mahipos man ang mga ini.
Indi man tawo ang naga-gana suno kay Pangilinan agud magdamo ang “likes” kag “shares” kundi computer.